الفرحة تواتيني

 

قالولي الفرحة ما تواتيكش، راسك صحيح عمرك ما تتعلم، صغيرة ماكش باش تفهم كلام كان بعد سنين، ترد على الكبار، تربي في الصغر، “ربي روحك الساعة !” 

عيب تقول هكا، عيب تعمل هكا، آش تعرف مالدنيا، تي انتي مالحومة ما خرجتش!

 

قالولي الفرحة عمرها ما تواتيك، عمرك ما باش تخدم الخدمة الي عينك فيها، آش عندك باش تتشرط على عروفاتك، لاك قارية و لاك فاهمة السيستام، على أنا خبرة تحكي؟ على الباك و الا النوفيام؟

 

قالولي الفرحة عمرها ما تواتيك، عمرهم ماهم باش يتلفتولك الرجال، الراجل يحب الحاذقة و الساكتة و العاقلة و الي كي أمو تقوليلها جيبلي تقوللها حاضر يا للتي ….

 

قالولي الفرحة عمرها ما تواتيك، في الميعاد لا تعلي صوتك، و لا تتهوبل، و لا تقول راني مريضة و آحمد ربي ديما، بالك جارتنا منجية تاخوك لولدها؟ ديما أضحك و آقعد مستوية

 

قالولي الفرحة عمرها ما تواتيك، الروبا البيضة ما تلبسها كان المقدية الي زهزت روحة مالطنجرة لروسات الملوخية، كي يسكر عليها الراجل باب الدار تقولو أنا أمك الثانية  و رايك هو الي يمشي حتى لو كنت ما عينكش فيا

 

قالولي الفرحة عمرها ما تواتيك، كان تحب تجيب الصغار رضي راجلك، بشبش بيه و آضحكلو، طيبلو حتى ما يلقى ما يتشهى، المرا ما ليها كان كوجينتها حتى لو كانت رئيسة

 

قالولي الفرحة عمرها ما تواتيك، نقص من طولت اللسان و المشي و الجيان، هاك خرجت هاك لبست، عيب المرا أي تخالط الرجال، شوف خدمة قريبة من دار بوك، ماكلت أمك ماكيفها ماكلة فاش قام تلوج على التمرميد؟ أغزر لحالتك قتلتك الغربة و كان حتى صورت حاجة كان الوجه لصفر!

 

قالولي الفرحة عمرها ما تواتيك، كان تحب تولي وزيرة أقرا و زيد أقرا خمسة سنين بعد الباك لعب صغار، أقرا كل شئ و آتثقف ياخي هكاكا هوما يوليو وزرا؟

 

قالولي الفرحة عمرها ما تواتيك، قريب تغلق الثلاثين و آنتي لتوا في دار بوك، بابا أعطيني أمي سلفني، آش ماولك باش تعرس؟ كل راجل يجيك تقللو لا، هذيكا طويل، هذيكا قصير، هذيكا أسمر هذيكا بلاش خدمة، فاتك الترينو يا طفلة

 

قالولي الفرحة عمرها ما تواتيك، شبيك تتشرط على الخدمة؟ شكونك باش ماتخدمش الي يجي تي غيرك في الدار، أخدم و آصرف من فلوسك و آلبس كيف أندادك و وري قدك

 

قالولي الفرحة عمرها ما تواتيك، شادة الدار و التلفزة، شادة الكتاب و المكتبة، أخرج مالكبي الي إنتي فيه و مكيج و أصبغ شعرك، برا شم شوية هوا و بدل الجو ما زلت صغيرة عيش و وقتك

 

خليتهم يحكو كيما يحبو، ما دام ربي راضي عليا الفرحة تواتيني ما تواتيكمش ! ! !

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s